बुटवल । कोशी प्रदेशकी उपसभामुख सृजना दनुवार उपचारका लागि भन्दै काठमाडौं हानिएपछि मुख्यमन्त्री उद्धव थापाको सरकार संकटमा पर्ने देखिएको छ । संसदमा आज विश्वासको मत लिने कार्यसूची रहेको बैठकमा उपसभामुख उपस्थित नभएपछि सत्तापक्षकै सांसदले अध्यक्षता गर्नुपर्ने भएको छ ।

दनुवार आज विहान साढे ८ बजे यति एयरको विमानबाट काठमाडौँ गएकी हुन् । उपसभामुखले बैठकको अध्यक्षाता गरेमात्रै मुख्यमन्त्री थापाले विश्वासको मत पाउँछन् । सत्ता गठबन्धनकै सांसदले अध्यक्षता गर्नुपरे विश्वासको मत पाउदैनन् । किनकी ९३ सदस्यीय प्रदेशसभामा सत्ता गठबन्धनसँग कठिन बहुमत ४७ मत मात्रै छ ।

नेकपा एमाले प्रमुख सचेतक रेवतीरमण भण्डारीले अचानक स्वास्थ्यमा समस्या देखिएपछि उपसभामुख दनुवार विहान ८ बजेको फ्लाइटमा काठमाडौँ गएको बताए । उनका अनुसार कांग्रेस सांसद इस्राइल मन्सुरीलाई बैठक सञ्चालन गर्ने जिम्मेवारी दिएर दनुवार काठमाडौँ गएकी हुन् । मन्सुरीले बैठक सञ्चालन गरे मुख्यमन्त्री थापाले विश्वासको मत पाउदैनन् ।

सभामुख र उपसभामुख नभएको अवस्थामा अध्यक्ष मण्डलका सदस्यले बैठक सञ्चालन गर्नुपर्छ । प्रदेशसभा सञ्चालनका लागि सभामुख र उपसभामुखलाई सहयोग गर्न चार सदस्यीय अध्यक्ष मण्डल छ । अध्यक्ष मण्डलका जेष्ठ सदस्य एमाले प्रदेशसभा सदस्य मालती सुब्बा हुन् । उनले अब केही दिन बैठकमा उपस्थित हुन नसक्ने निवदेन दिएकी छन् । अध्यक्ष मण्डलमा उनी पछिको ज्येष्ठ सदस्य राप्रपाका अम्बरबहादुर विष्टले पनि अनुपस्थित हुने बताएका छन् । अध्यक्ष मण्डलमा कांग्रेसका इस्राइल मन्सरी र माओवादी केन्द्रकी गीता तिम्सिना सदस्य छन् ।

उपसभामुख दनुवारले दिएको जिम्मेवारी अनुसार मन्सुरीले बैठकको अध्यक्षाता गरे थापाले विश्वासको मत पाउँदैनन् । जसकारण आजको बैठक नै अनिश्चित बनेको हो । ९३ सदस्यीय प्रदेशसभामा बहुमतका लागि ४७ मत चाहिन्छ । मुख्यमन्त्री उद्धव थापाको नेतृत्वमा रहेको सरकारलाई कांग्रेसका २९, माओवादी केन्द्रका १३, नेकपा एकीकृत समाजवादीका ४ र जसपाको एक गरी ४७ सांसदको समर्थन छ । जुन कठिन बहुमत हो । उनको विपक्षमा एमालेका उपसभामुख बाहेक ३९ र राप्रपाको ६ जना सांसद छन् ।