बुटवल बसपार्कमा नि:शुल्क आँखा परीक्षण शिविर

बुटवल । सुरक्षित यात्रा तथा दुर्घटना न्युनिकरणको सचेतनासहित विहिबार बुटवल बसपार्कमा नि:शुल्क आँखा परीक्षण शिविर सञ्चालन गरिएको छ । राजमार्ग सुरक्षा तथा ट्राफिक व्यपस्थापन कार्यालय बुटवलको आयोजना, सुरक्षित यात्रा नेपालको सहकार्य तथा लायन्स क्लब अफ बुटवलको प्राविधिक सहयोगमा सवारी चालकहरुका लागि आँखा परीक्षण शिविर सञ्चालन गरिएको हो ।

अभियानको उद्घाटन गर्दै राजमार्ग सुरक्षा तथा ट्राफिक व्यवस्थापन कार्यालय बुटवलका प्रहरी नायव उपरीक्षक होमबहादुर थापाले  ट्राफिक नियमको पालना अरुका लागि नभई आफ्नै लागि हो भन्ने  भावनाको विकास गर्न आवश्यक रहेको बताए । दुर्घटना न्युनिकरणका लागि सबैभन्दा बढी सवारी चालकहरु नै सचेत हुन आवश्यक रहेको बताउँदै उनले यात्रुहरुले समेत त्यस कुरामा ध्यान दिन जरुरी रहेको उल्लेख गरे । समुदाय-प्रहरी साझेदारी कार्यक्रम अन्तरगत ‘ट्राफिक प्रहरीको चाहना सुरक्षित र सहज यात्राको कामना’- भन्ने मूल नारासहित शिविरको आयोजना गरिएको हो ।  

सो अवसरमा बोल्दै सुरक्षियात्रा नेपालका कृष्ण प्रसाद बेलबासेले सुरक्षित यात्राले सबै यात्रु तथा चालक-सहचालकको अमुल्य जीवन वचन सक्ने उल्लेख गरे । यस्तै नेपाल पत्रकार महासंघ रुपन्देहीका उपाध्यक्ष विश्वास ढकालले दुर्घटना न्युनिकरणका लागि सबै आ-आफ्नो क्षेत्रबाट जिम्मेवार हुनु पर्नेमा जोड दिए ।

Advertisement