पाल्पाको तिनाउमा वन महोत्सव तथा डढेलो नियन्त्रण सम्बन्धि बृहत् आमसभा हुने

बुटवल । पाल्पाको तिनाउ–१ कचलमा वन महोत्सव तथा डढेलो नियन्त्रण सम्बन्धि बृहत् आमसभाको तयारी गरिएको छ । तयारीका लागि छलफल गर्न बैठक सामुदायिक वन समन्वय समितिको बुधबार बैठक बसेको हो ।

Advertisement

बैठकमा सामुदायिक वन समन्वय समिति, तिनाउका वरिष्ठ उपाध्यक्ष दलबहादुर गुरुङले सामुदायिक वन समन्वय समितिले गर्ने कार्यहरु, यसको प्रभावकारिता र चैत्र ६ अनि ७ गते गरिने वन महोत्सव एवम् डढेलो नियन्त्रण सम्बन्धि आमसभामा सामुदायिक वन उपभोक्ता समूहले खेल्ने भूमिकाका बारे जानकारी गराएका थिए ।

बैठकमा समन्वय समितिका अध्यक्ष पदमलाल शाक्यले वन महोत्सवमा आ–आफ्ना सामुदायिक वनमा पाइने वनस्पति, जडिबुटी र पशुपंक्षीहरुका फ्लेक्स प्रदर्शनी र डढेलो नियन्त्रण सम्बन्धि आमसभामा स्थानीय समूहरुले आफ्नो गीत तथा नृत्यका साथै संरक्षणसम्बन्धी सन्देश प्रवाह गरिने बताए । बैठकका प्रमुख अतिथि वडाध्यक्ष भुवानसिंह चिदीले आफ्नो वडामा गौरवको कार्यक्रम आयोजना हुन थालेकोमा खुसी व्यक्त गर्दै सबै सरकारी, गैरसरकारी संस्थाहरु एवम् सामुदायिक वन उपभोक्ता समूहहरुले सक्दो सहयोग गर्ने प्रतिवद्वता जनाएका थिए । महोत्सवले वनप्रतिको चासो थप बढ्ने बताए ।

महोत्सवमा राष्ट्रिय र स्थानीयस्तरका कलाकारहरुको प्रस्तुति रहने समन्वय समितिका सदस्य सावित्रा रानाले बताईन् । उक्त महोत्सवलाई सफल बनाउन स्वागत तथा सत्कार उपसमिति, खाजा तथा खाना र आवास व्यवस्थापन उपसमिति गठन गरि प्रभावकारी कार्यक्रम सञ्चालन गर्न सचिवालय समेत गठन गरिएको समितिका सदस्य भोजबहादुर छहरीले बताए । बैठकमा वडा नम्बर १ का १३ वटा सामुदायिक वनका ३७ जनाको सहभागिता रहेको थियो ।