विश्व मुख स्वास्थ्य दिवसमा नेपाल डेन्टल एसोसिएशनद्वारा विविध कार्यक्रम

बुटवल । नेपाल डेन्टल एसोसिएसन रुपन्देही शाखाले विश्व मुख स्वास्थ्य दिवस विभिन्न कार्यक्रम आयोजना गरी मनाइएको छ । ‘आ–आफ्नो मुखप्रति गर्व गरौँ’ भन्ने नाराका साथ आइतबार यो दिवस मनाइएको हो ।

Advertisement

दिवसका अवसरमा दाँतको सफाइ तथा मुख स्वास्थ्यको विषयमा जनचेतनामूलक र्याली, आश्रममा खाद्यन्न सहयोग, निःशुल्क दन्त परिक्षण र रक्तदान लगायतका कार्यक्रम सम्पन्न गरिएको नेपाल डेन्टल एसोसिएसन रुपन्देहीका उपाध्यक्ष डा। दिपेन्द्र पोखरेलले जानकारी दिए । आइतबार बिहान बुटवल स्थित लुम्बिनी प्रादेशीक अस्पतालबाट सुरु भएको मुख स्वास्थ्यसम्बन्धी बृहत् जनचेतनामूलक र्याली ट्राफीक चोकसम्म पुगेर प्रादेशीक अस्पतालमै फर्कीएको थियो । र्यालीमा डाक्टर, डेन्टल एसिस्टेन्ट, विद्यार्थीहरु समेत सहभागी भएका थिए ।

त्यस्तै दिवसका अवसरमा बुटवल–११ देविनगर स्थित नेपाल अपांग आश्रममा खाद्यन्न सहयोग गरेको छ । भने, आश्रममा आश्रित रहेका नागरिकहरुको निःशुल्क दन्त परिक्षण गरिएको थियो । उक्त आश्रममा आश्रित रहेका नागरिकहरु बिरामी हुँदा रुपन्देही शाखाले सम्बन्धीत रोगका बिशेषज्ञहरुबाट निःशुल्क उपचार गर्दै आएको उपाध्यक्ष डा.पोखरेलले बताए । त्यसैगरि दिवसका अवसरमा रक्त सञ्चार केन्द्र बुटवलमा रक्तदान कार्यक्रम पनि सम्पन्न भएको छ । नेपाल डेन्टल एसोसिएसन रुपन्देहीका अध्यक्ष डा.बिकास कुमार अग्रहरीको अध्यक्षतामा कार्यक्रम सम्पन्न भएको थियो ।

हरेक व्यक्तीले दाँत तथा मुखको स्वास्थ्यमा विशेष ध्यान दिनुपर्ने उनले बताए । बिहान र बेलुका नियमित दाँत माझ्दा मुख तथा दाँत सम्बन्धी धेरै रोगहरूलाई नियन्त्रण गर्ने सकिने डा.अग्रहरीको भनाई थियो । अधिकांश नेपालीहरूलाई बिहान बेलुका खाना खाएपछि दाँत माझ्नुपर्छ भन्ने ज्ञान नभएको र दाँत माझ्ने तरिका थाहा नभएको उनले बताए । बालबालिकाहरुलाई पनि मुख स्वास्थ्यबारे जानकारी गराउनुपर्नेमा डा। अग्रहरीले जोड दिए ।

‘शरीरका सम्पूर्ण अंगहरुलाई स्वस्थ र सुचारु राख्नका लागि पनि खानेकुरा र पौष्टिक तत्वहरु मुखबाटै खाने गरिन्छ । तर मुख नै स्वस्थ राख्न सकिएन भने शरीर पनि स्वस्थ रहन सक्दैन ।’ सहसचिव डा. सुनिल खरेलले भने । नियमित सुर्तीजन्य पदार्थको सेवन गर्दा दाँत तथा गिजामा दाग बस्ने र पछि मुखको क्यान्सर समेत हुनसक्छ । हरेक वर्ष मार्च २० का दिन विश्व मुख स्वास्थ्य दिवस मनाउने गरिएको छ ।