‘सरकारले जनताको पक्षमा काम गर्न सकेन’

भैरहवा। राष्ट्रिय प्रजातन्त्र पार्टी (राप्रपा) का नेताहरुले पार्टी राष्ट्रिय एकताको पक्षमा रहेको बताएका छन् । उनीहरुले पार्टी नेपाली जनताको साथमा रहेको बताए । राप्रपा लुम्बिनी सांस्कृतिक नगरपालिका वडा नम्बर ११ को वडा भेलालाई बुधबार मसिनामा सम्बोधन गर्दैै पार्टीका केन्द्रीय सदस्य ताहिर अलीले वर्तमान सरकारले जनताको पक्षमा काम गर्न नसकेको आरोप लगाए ।

उनले लिपुलेक र कालापानीलाई समेटेर जारी गरिएको नयाँ नक्सा घोषणा गर्दा राप्रपाले त्यसलाई समर्थन गरेको बताए । नेपालको सीमा भारत र चीन कसैले पनि मिच्नु हुँदैन, उनले भने । लुम्बिनीको विकासको लागि धेरै कुरा भए पनि सोचे अनुरुप विकास हुन नसकेको बताए । लुम्बिनीको विकासको लागि स्थानीयवासीलाई पनि सरकारले समेटन सक्नुपर्ने बताए । त्यस्तै राप्रपाका केन्द्रीय सदस्य गंगाराम जैसवाल, प्रवासी नेपाली एकता समाज (यूएई)का वरिष्ठ उपाध्यक्ष मनोज जैसवाल, पार्टीका रुपन्देही जिल्ला सदस्य नाजिर अली, लुसनपा अध्यक्ष राजेश यादव लगायतले बोल्दै मुलुक र जनताको हितमा काम गर्ने पार्टी राप्रपा भएको दावी गरे ।

यसैबीच भेलाले अब्दुल सत्तार शेषको अध्यक्षतामा २३ सदस्यीय नयाँ कार्यसमिति चयन गरेको छ । जसको उपाध्यक्षमा जलालुद्दिन मुसलमान रहेका छन् । भेलामा नेपाल कम्युनिष्ट पार्टी (नेकपा), नेपाली कांग्रेस, जनता समाजवादी पार्टी नेपाल (जसपा) परित्याग गरी ४४ जना नेता तथा कार्यकर्ता राप्रपामा प्रवेश गरेका छन् । उनीहरुलाई पार्टीका केन्द्रीय सदस्य ताहिर अली, गंगाराम जैसवाल लगायतले पार्टी प्रवेश गराए । पार्टी प्रवेश गर्नेहरुमा उर्मिला माली, वारिस अली मुसलमान लगायत रहेका छन् ।