ताजा अपडेट »

लम्पी स्किन रोगबाट पशु मरेका कृषकलाई क्षतिपूर्ति दिन सक्दैनौं : कृषिमन्त्री भुसाल

विहीबार, ३२ साउन २०८०, १५ : १०
36 Shares
विहीबार, ३२ साउन २०८०
36 Shares

काठमाडौँ । कृषि तथा पशुपन्क्षी मन्त्री डा बेदुराम भुसालले लम्पी स्किन रोगबाट मरेका पशुहरूको क्षतिपूर्ति दिन नसकिने बताएका छन् । बिहीबार प्रतिनिधि सभा अन्तर्गत रहेको कृषि समितिमा बोल्दै मन्त्री भुसालले लम्पी स्किन रोगबाट प्रभावित किसानका लागि क्षतिपूर्ति दिन नसकिने बताउका हुन् । उनले राहत दिनका लागि भने कार्यविधि बनाउने काम भइरहेको बताए ।

‘पशुको मृत्यु भएकालाई क्षतिपूर्ति दिन सक्ने अवस्था त छैन । क्षतिपूर्ति दिन नसके पनि राहत दिनका लागि आधार र मापदण्ड सहितको कार्यविधिको मस्यौदा बनाएको छ । त्यो पारित भएपछि राहत दिने काम अघि बढ्न सक्छ ।’–मन्त्री भुसालले भने । गत चैत महिनादेखि पश्चिम नेपालबाट लम्पी रोगको सङ्क्रमण फैलिएको बताउँदै हालसम्म १३ लाख ५ हजार पशु सङ्क्रमित भएको जानकारी गराए । जसमध्ये १० लाख हाराहारी सङ्क्रमण मुक्त भएको, ४७ हजार ६ सय ४९ पशुको मृत्यु भएको जानकारी दिए ।

मन्त्री भुसालले टर्कि, तान्जानियाबाट १३ लाख ६९ हजार डोज भ्याक्सिन ल्याएको र ६ लाख पशुलाई भ्याक्सिन दिइएको जानकारी दिए । उनले यो रोग निरन्तर देखिने भएकोले नेपालमै खोप उत्पादन गर्नेतिर लाग्नुपर्ने, त्यसका लागि सिडभाइरस ल्याएर नेपालमै खोप उत्पादन तिर लाग्ने योजना रहेको बताए । लम्पी स्किन संसारमा नयाँ रोग रहेको बताउँदै नेपालमा २०७७ सालमा देखिएको बताए । यसअघि पहिले नै भारत र चीनमा यो रोग फैलिएको बताउँदै उनले त्यहाँ गरिएको नियन्त्रणबाट शिक्षा लिन नसक्दा नेपालमा क्षति बेहोर्नु परेको उल्लेख गरे ।

मन्त्री भुसालले मन्त्रालयले पशु स्वास्थ्य चिकित्सक सहित ७ प्रदेशमा टोली पठाएर रोगको बारेमा जानकारी दिने र उपचार कसरी गराउने भन्ने बारेमा जानकारी दिने गरेको बताए ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।