सम्झौता कार्यान्वयन नभए संघर्ष गर्छौ : टाईगर्स

भैरहवा । शसस्त्र बिद्रोह गरि वार्ताको माध्यमबाट शान्ती प्रक्रियामा आएको तराई मधेश जनता पार्टी (टाईगर्स) ले वार्तामा सम्झौता भएका बुंदाहरु कार्यान्वयन नभएको गुनासो गरेको छ ।टाईगर्सले भैरहवामा पत्रकार सम्मेलनको आयोजना गरि सरकारले सम्झौता कार्यान्वयन नगरे फेरी आन्दोलनमा जाने चेतावनी दिएको छ ।

‘२०७५ सालमा नेपाल सरकारका तत्कालीन वार्ताटोली प्रमुख सोमप्रसाद पाण्डे र बिद्रोही संगठन टाईगर्सका वार्ताटोलीका संयोजक रोशन साह बीच बिभिन्न ११ बुंदे शान्ती स्म्झौता भएको थियो ।’ पार्टीको केन्द्रिय सचिव मेजर पाण्डेले भने “हामीले सरकारसित गरेका सबै प्रतिवद्धता पूरा गरि शान्तीपूर्ण राजनितिमा लागेका छौं, तर सरकारले गरेका कुनै पनि सम्झौता कार्यान्वयन भएन ।”

सरकारले पार्टीका कार्यकर्तालाई लागेको मुद्दा फिताई लिई शान्तीपूर्ण राजनिति गर्न दिने सम्झौता भएको थिया । तर अहिले पनि कतिपय कार्यकर्ताहरु भागी–भागी हिड्नु परेको उनले जानकारी दिए । यस्तै अझै पनि ८–९ जना कार्यकर्ताहरु नेपालका बिभिन्न जेलमा रहेको उनले बताए । “सरकारले यी सबैलाई रिहाई गर्ने वाचा गरेको थियो तर अहिलेसम्म वाचा पूरा गरेन ।”–पाण्डेले भने ।

यस्तै शसस्त्र आन्दोलनको क्रममा मृत्यु भएकालाई शहिद घोषणा र आश्रित परिवारलाई क्षतिपूर्तिको सम्झौता पनि पूरा नभएको उनले बताए । उनले यहि चैत्र मसान्तसम्म पनि सरकारले ११ बुंदे सम्झौता र आफ्नो वाचा पुरा नगरे सरकार बिरुद्ध शान्तीपूर्ण संघर्ष गर्ने चेतावनी दिए । सरकारी असहयोगकै कारण विधिवत पार्टी दर्ता गर्न नसकेको पार्टीको आरोप छ ।

यस अघि सरकारलाई बिभिन्न समयमा ज्ञापनपत्र लगायतबाट ध्यानाकर्षण गराए पनि सरकारले कुनै कदम नचालेको भन्दै उनले आक्रोश ब्यक्त गरे । अबको आन्दोलनमा देशभरिका कार्यकर्ता परिचालित गरि सरकार बिरुद्ध संघर्ष गर्ने केन्द्रिय सचिव मेजर पाण्डेको भनाई छ । शसस्त्र विद्रोहमा लागेको तत्कालीन टाईगर्स पार्टी २०७५ सालमा सरकारसंग ११ बुंदे सम्झौता गर्दै शान्तीपूर्ण धारमा आएको थियो । त्यस अघि नै समूहले आफूसंग भएको हतियार मध्ये २८ वटा वार्ताटोलीलाई र १ सय ४ वटा जिल्ला प्रहरी कार्यालयमा बुझाइ सकेको केन्द्रिय सचिव पाण्डेले जानकारी दिए ।