भैरहवा । १ सय ११ औं अन्र्तराष्ट्रिय श्रमिक महिला दिवसको अवसर पारी भैरहवामा बिभिन्न कार्यक्रमहरु सम्पन्न भएको छन् । दिवसकै अवसरमा श्रमजिवी महिलाहरुलाई सम्मान पनि गरिएको छ ।

मायादेवी च्यारिटेबल फाउण्डेशनले सोमबार भैरहवामा दिवसको मौका पारी समाजमा बिशिष्ट योगदान गर्ने महिलाहरुलाई सम्मान गरेको छ । फाउण्डेशनले पत्रकारीताको माध्यमबाट समाजमा महत्वपूर्ण भूमिका निभाएको भन्दै पत्रकार शारदा मल्ललाई सम्मान गरेको छ । यस्तै स्वस्थ्य क्षेत्रबाट भिम अस्पतालकी मेडिकल सुपरिडेण्टेन डाक्टर शकुन्तला गुप्ता र समाजसेवी महिलाको रुपमा शान्ता कंडेललाई पनि सम्मान गरेको फाउण्डेशनका संस्थापक रवि कुमार रौनियारले जानकारी दिए । कार्यक्रममै कोभिड बिशेष अस्पताल सञ्चालन गर्ने युनिभर्सल कलेज अफ मेडिकल साईन्सेजका डाक्टर लुना अर्याल र हालै सम्पन्न सिद्धार्थ उद्योग बाणिज्य संघको निर्वाचनमा खुल्ला तर्फ उम्मेदवारी दिएकी एक मात्र महिला सदस्य रचना क्षेत्रीलाई सम्मान गरेको छ ।

फाउण्डेशनले भैरहवामा एक कार्यक्रमको आयोजना गरि सिद्धार्थनगर नगर पालिका वडा नम्बर २ बस्ने गुडिया बनिया र वडा नम्बर ७ बस्ने सजरुन निसालाई व्हील चेयर समेत प्रदान गरेको छ । त्यस्तै ३ जना अति विपन्न महिलालाई नगद रकम सहित एक महिनाको लागी खान पुग्ने राहत सामाग्री प्रदान गरिएको रौनियारले बताए । उनले दिवसकै अवसरमा महात्मा बुद्ध माध्यमिक बिद्यालयमा अध्ययनरत् ९ र १० कक्षाका बालिकाहरुलाई शैक्षिक सामाग्री समेत प्रदान गरिएको जानकारी दिए । यस्तै कोभिडको कारण बन्द गरिएको अन्नपूर्ण भोजन पनि नारी दिवसकै अवसर पारेर सुरु गरिएको रौनियारले जानकारी दिए ।

१ सय ११ औं अन्तराष्ट्रिय श्रमिक महिला दिवसकै अवसर पारी सिद्धार्थनगर नगर पालिकाले पनि २ जना श्रमजिवी महिलाहरुलाई सम्मान गरिएको छ । नगरपालिका भित्र रहेर जोखिम पुर्ण श्रमसंग आवद्ध श्रमिक महिलाको श्रमको मूल्यांकन गर्दै नगद ५ हजार सहित सम्मान गरिएको थियो । यसरी सम्मानित हुनेमा डकर्मिको काम गर्दै आएकी नसिमा खातुन अन्सारी र यातायात क्षेत्रमा संलग्न रहेकी परिचालक तुलसा कुमारी रावललाई सम्मानित गरिएको थियो । दिवसकै अवसरमा नगरपालिकाको कार्यालयले सामाजिक बिकास मन्त्रालयको सहकार्यमा प्रभातफेरी पनि सम्पन्न गरेको थियो । बिभिन्न संघसंस्था, सुरकारी कार्यालय, महिला स्वास्थ्य स्वयम सेविका संलग्न र्याली बुद्धचोकबाट सुरु भई मिलन चोक, बैंकरोड हुँदै देवकोटा चोकमा पुगेर कार्यक्रममा परिणत भएको थियो ।

कार्यक्रमलाई सम्बोधन गर्दै लुम्बिनी प्रदेशका सामाजिक बिकास मन्त्री सुर्दशन बरालले राज्यको निति निर्माणको तहमा महिलाहरुको समान सहभागीताको परिकल्पना गरिएको बताए । महिला अधिकारको पक्षमा निर्माण भएका कानूनहरुलाई कार्यान्यनमा जोड दिनु पर्ने बताए । यसको साथै हाम्रो सामाजिक चेतनालाई पनि वृद्धि गर्दै महिलाहरुको सम्मान परिवारबाटै सुरु गर्नु पर्ने बताए ।
सिद्धार्थनगर नगरपालिकाकी उपमेयर उमा काफ्लेको अध्यक्षतामा सम्पन्न कार्यक्रममा सभासद आदित्य नारायण कसौधन, रुपन्देहीका प्रमुख जिल्ला अधिकारी पिताम्बर घिमिरे, जिल्ला प्रहरी प्रमुख प्रवीण पोखरेल लगायतले बोलेका थिए ।

यस्तै दिवसकै अवसर पारी रोहिणी गाउँपालिकामा पनि महिला अधिकार बारे अन्तरक्रिया कार्यक्रम सम्पन्न भएको छ । रोहिणी गाउँपालिका उपाध्यक्ष शिवकान्ती चमारको अध्यक्षता गाउँपालिका अध्यक्ष सनोज कुमार यादवको प्रमुख आथित्यता र प्रमुख प्रशासकिय अधिकृत रोमनाथ न्यौपानेको बिशिष्ठ आतिथ्यतामा कार्यक्रम सम्पन्न भएको थियो । रेनु पाण्डेले सञ्चालन गरेको कार्यक्रममा दिवसको अवसर र यसका महत्वबारे जमुना शर्माले बताएकी थिईन।

प्रत्येक बर्ष अंग्रेजी मार्च महिनाको ८ तारीखमा अन्र्तराष्ट्रिय श्रमिक महिला दिवस मनाउने गरिएको छ । कतै नारी दिवस, कतै महिला दिवस र कतै श्रमिक महिला दिवस भनिए पनि मुलभुत रुपमा महिलाहरुलाई समान अधिकारको माग सहित यो दिवस मनाउने गरिएको छ । दिवसको यस बर्षको नारा “महिलाको सुरक्षा, सम्मान र रोजगार समृद्ध नेपालको आधार” रहेका थियो ।