भैरहवाका जनताले दिए ट्राफिक प्रहरीलाई घर

भैरहवा । रुपन्देहीको भैरहवामा स्थानीयले ट्राफिक प्रहरीलाई घर उपहार दिएका छन् । यस अघि कहिले राजमार्गको पूर्व त कहिले पश्चिम बिभिन्न भाडाका घरमा अप्ठ्यारोका साथ बस्दै आएका ट्राफिक प्रहरीलाई अब बसाईमा सहजता आउने भएको छ । वर्षौदेखी भाडाका घरमा बस्दै आएका ट्राफिक प्रहरीले घर पाएपछि सहज हुने भएको छ ।

Advertisement

प्रहरी र जनता बीच सकारात्मक सम्बन्धको प्रयास स्वरुप भैरहवाका उद्योगी एवम् ब्यवसायीको अग्रसरतामा जिल्ला ट्राफिक कार्यालय रुपन्देहीलाई अढाई तल्ले भवन हस्तान्तरण गरिएको छ । सिद्धार्थनगर नगरपालिका–९ गोलिगढमा नगरपालिकाको कार्यालयले उपलब्ध गराएको करिब २ कठ्ठा जग्गामा सरकारी सहयोग बिना नै डेढ करोड बढी लागतमा घर सम्पन्न गरि ट्राफिक प्रहरी कार्यालयलाई प्रदान गरिएको छ । अप्ठ्यारो माहौलमा प्रहरीले आफ्नो पूर्ण कार्यक्षमता प्रदर्शन गर्न नसक्ने ठान्दै प्रहरी र स्थानीयको सहकार्य स्वरुप उक्त भवन निर्माण गरिएको भवन निर्माण समितिका अध्यक्ष कृष्णप्रसाद शर्माले बताए । उनले अब ब्यवसायी प्रहरीसित आतंकित नभई सहकार्यको भावनाले अगाडी बढेमात्र दुर्घटना न्यूनिकरण एवम् अपराध नियन्त्रणमा सहज हुने बताए ।

समितिका कोषाध्यक्ष मंगल भण्डारीले बिभिन्न दाताहरुबाट प्राप्त भएको १ करोड ५२ लाख बढी रकम मध्ये १ करोड ५१ लाख ३० हजार ९ सय लागतमा उक्त भवन तयार भएको बताए । अढाई तल्ले भवनको पहिलो भुईतल्लामा कार्यालय, प्रथम तल्लामा जुनीयर प्रहरी अधिकृत, प्रहरी हवल्दार र प्रहरी जवान ब्यारेक र पहिलो तल्लामा कार्यालय प्रमुखको आवास सहित अतिथि गृह लगायतको संरचना निर्माण गरिएको जानकारी दिए ।

निर्माण समितिले आईतबार एक कार्यक्रमको आयोजना गरि उक्त भवन प्रहरीलाई हस्तान्तरण गरेको हो । भवन उद्घाटन नेपाल प्रहरीका प्रहरी महानिरिक्षक शैलेश थापाले गरेका छन् । उद्घाटन कार्यक्रममा बोल्दै थापाले उद्यमी व्यवसायीको सक्रियता एवं जनसहभागितामा निर्मित नयाँ र आधुुनिक भवन सौजन्य पाएकाले भवनबाट दिनु पर्ने सेवा पनि आधुनिक र नयाँ हुनुपर्ने बताए । उनले नेपाल प्रहरीले पछिल्लो तीन वर्षमा मात्रै झण्डै ५ सय २० रोपनी जग्गा प्राप्त भएको बताए । यसले नै नेपाल प्रहरीप्रति नेपाली जनताको सहयोगको भावना कति छ भन्ने स्पष्ट रहेको उनको तर्क छ ।

यस्तै सोही कार्यक्रममा बोल्दै उनले नेपाल प्रहरीलाई सबैभन्दा बढी आरोप लाग्ने विषय प्रहरीको रुखो ब्यवहार भएकोले प्रहरीलाई नम्र भएर काम गर्न निर्देशन दिए । “नम्र हुनु भनेको कमजोर हुनु हैन, कमजोर मान्छेले कडा कुरा गर्छ, असल मान्छेले राम्रो काम गर्छ त्यसैले तपाई सेतो टोपी लगाएकाहरु नम्र भएर काम गर्न निर्देशन दिन्छु । असल हुनुस, विनम्र हुनुस तर कमजोर नहुनुस् ।”-थापाले भने ।

उनले यो शान्ती भुमि भएकोले यहाँ काबुलको जस्तो जताततै प्रहरी देखिनु आवश्यक नभएको बताए । “नागरिक नै प्रहरीको रुपमा सादा पोशाकमा उपस्थित हुनुहुन्छ र सुरक्षाको पहरेदारी गर्नुहुन्छ भने त्यो सबैभन्दा राम्रो सुरक्षा हो, प्रहरीको उपस्थिति नै नहुने भन्ने होइन ।” उनले भने ।
कार्यक्रममा भवन निर्माणमा सहयोग पुर्याउने बिभिन्न दाताहरुलाई सम्मान गरिएको थियो ।