द नेक्स्ट फेस लुम्बिनीको उपाधि ढकाललाई

बुटवल । सौन्दर्य प्रतियोगिता , द नेक्सट फेस लुम्बिनीको उपाधि अभिषेक ढकाल र ममता रानाले जितेका छन् । एक महिनादेखि जारी प्रतियोगिताको शनिबार सम्पन्न ग्राण्ड फिनालेबाट मिस्टरतर्फ ढकालले उपाधि जितेका हुन् भने मिसतर्फ रानाले जितेकी हुन् । स्टाइल क्रियशनको आयोजनामा बुटवलमा सम्पन्न प्रतियोगितामा सहभागी अन्य प्रतियोगीलाई पछि पार्दै द्वय ढकाल र रानाले उपाधिसँगै नगद १५ हजार र म्यूजिक भिडियोमा अभिनय गर्ने अवसर प्राप्त गरेका छन् ।उनीहरुलाई मोडलिङका लागि सो अवसर स्वाभिमान क्रियशनले अवसर दिने क्रियशनका निर्देशक तथा मोडल राजु महोत्राले बताए ।

विभिन्न प्रस्तुतीसँगै निर्णायकको प्रश्नमा उत्कृष्ट उत्तर दिएर विजयी बनेका ढकालले विजेतासँगै भ्यूअर्स च्वाइसको उपाधि पनि जित्न सफल भए भने उनीसँगै मिसतर्फ इशिका सुबेदीले पनि भ्यूअर्स च्वाइसको उपाधि जितेकी छन् । त्यसैगरी मिस्टर मल्टीमिडियातर्फको उपाधि पनि जितेर ढकाल प्रतियोगितामा ह्याट्रिक गर्न सफल भएका छन् ।

प्रतियोगितामा मिसतर्फ फ्रस्ट रनर अपको उपाधि उमा पौडेल र मिस्टरतर्फ प्रविन रसाइलीले जितेका छन् भने मिसतर्फ हेमा भट्टराई र मिस्टरतर्फ रोहन खत्रीले सेकण्ड रनर अपको उपाधि जितेका छन् । त्यसैगरी कल्पना गिरी र विशाल सुनारले कोरियोग्राफर च्वाइसको उपाधि प्राप्त गरेका छन् । बिनिता भण्डारी र इशिका सुबेदीलेले अर्गनाइजर च्वाइसको उपाधि जितेका छन् ।

आयोजक स्टाइल क्रियशनका प्रबन्ध निर्देशक साहिर केसीको अध्यक्षता र बुटवल उपमहानगरपालिका उपप्रमखु गोमादेवी आचार्यको प्रमुख आतिथ्यतामा सम्पन्न ग्राण्ड फिनालेमा मिस नेपाल अर्थ २०१८ प्रिया सिग्देल मुख्य निर्णायक रहेकी थिइन् । त्यसैगरी निर्णायकमा म्यूजिक डाइरेक्टर नारायण शर्मा,फेशन डिजाइनर अनुपमा श्रेष्ठ,मोडल तथा कोरियोग्राफर प्रशान्त शाह,डान्सर तथा मोडल शिवा क्षेत्री,द रन वे –२०१८ अञ्जली नेपाली,मिस्टर पश्चिमाञ्चल –२०१९ विशाल मगर रहेका थिए ।

प्रतियोगिताका लागि चर्चित कोरियोग्राफर सुजित बस्यालले मुख्य कोरियोग्राफरको भूमिका निर्वाह गरेका थिए भने पूजा क्षेत्रीले अशिष्टेण्ट कोरियोग्राफरको भूमिका निर्वाह गरेकी थिइन् । चर्चित कोरियोग्राफर रेशम न्यौपानेको सञ्चालनमा भएको कार्यक्रममा प्रतियोगितालाई सहयोग गर्ने विभिन्न संघसंस्था तथा व्यक्तिहरुलाई सम्मान गरिएको थियो । प्रतियोगिताको ग्राण्ड फिनालेकै अवसरमा कलाकार,गायक उज्ज्वल गिरी ‘दानविर’ दानविर , श्रीधर अधिकारी लगाएत विभिन्न कलाकेन्द्रबाट सांस्कृतिक प्रस्तुती समेत रहेको प्रतियोगिताका संयोजक गोकुल न्यौपानेले जानकारी गराए ।।