नेतृत्वले विवेक गुमायो : मुख्यमन्त्री पोखरेल

बुटवल । लुम्बिनी प्रदेशका मुख्यमन्त्री तथा नेकपा स्थायी कमिटी सदस्य शंकर पोखरेलले नेतृत्वले विकेक गुमाउँदा पार्टीभित्र संकट सिर्जना भएको बताएका छन् । नेकपा अध्यक्षद्वय केपी शर्मा ओली र पुष्पकमल दाहाल प्रचण्डले बीचको असमझदारीनै संकटको मुख्य कारण भएको उनले बताए ।

शुक्रबार पुर्व-पश्चिम लोकमार्ग अन्तरगत रुपन्देहीको सैनामैनामा-११, पिपल डाँडामा निर्माण सुरु गरिएको स्मार्ट रिफ्रेस सेन्टरको शिलान्यास गर्दै पोखरेलले नेकपा भित्रको देखिएको समस्या सामना गर्न आफू तयार भएको बताएका छन् । ‘नेतृत्वको विवेक गुमेको छ । उनीहरुको विवेक हामी फर्काउँछौं ।’-पोखरेलले भने । दुई अध्यक्ष बीचको असमझदारी नै पार्टी भित्र संकटको मुख्य समस्या बन्न पुगेको उनले बताए ।

फरक प्रसङ्गमा मुख्यमन्त्री पोखरेलले लुम्बिनी मुलुककै पहिलो प्रदेशको रुपमा अगाडी बढेको दाबी गरेका छन् । ‘प्रदेश सरकार खोजिने होइन देखिने अवस्थामा पुगेको छ ।’-उनले भने ‘पूँजीगत खर्चमा सबैभन्दा अगाडी रहेको लुम्बिनी प्रदेश समृद्धिको बाटोतर्फ लम्किएको छ ।’ प्रदेशका सबै स्थानीय निकायहरुका लागि पूँजिगत बजेको व्यवस्था तथा कार्यान्वयनका क्षेत्रमा लुम्बिनी अगाडी रहेको दाबी गर्दै उनले समृद्धिका लागि आधाभूत लक्ष्य हासिल गर्ने क्रममा रहेको दाबी गरे ।