सुदूरपश्चिममा कोरोना सङ्कटः संक्रमितहरूले होम आइसोलेसनमै ज्यान गुमाउँदै

धनगढी । शुक्रवार राती कैलालीको टिकापुरका दुई जना कोरोना सङ्क्रमितले होम आइसोलेसन मै ज्यान गुमाए । कैलाली टीकापुर नगरपालिका–१ का ४९ वर्षीय पुरुष र बर्दगोरिया गाउँपालिका–४ का ५९ वर्षीय महिलाको समयमै उपचार नपाउँदा घरमै ज्यान गयो । यो त एक प्रतिनिधि घटना मात्रै हो ।

सुदूरपश्चिममा कोरोना सङ्क्रमण भयावह बनिसकेको छ । चैत १४ गते पहिलो सङ्क्रमित देखिएको सुदूरपश्चिममा अहिलेसम्म ९ हजार ८ सय ७७ जनामा सङ्क्रमण पुष्टि भइसकेको छ ।

प्रदेश स्वास्थ्य निर्देशनालयका अनुसार तीमध्ये १ हजार ४ सय ७३ जना अझै सक्रिय सङ्क्रमित छन्। अहिलेसम्म सुदूरपश्चिम प्रदेशभित्र २७ जनाको ज्यान गएको छ भने अन्यत्र उपचार गराउने क्रममा ज्यान गुमाएकाको समेत सङ्ख्या जोड्दा यस प्रदेशका ४० जनाले कोरोना सङ्क्रमणबाट ज्यान गुमाइसकेका छन्।

अस्पतालमा आइसियु र भेन्टिलेटर अभाव
पछिल्लो समय कोरोना सङ्क्रमितको सङ्ख्या मात्रै बढेको छैन, सङ्क्रमितमा कडा खालको लक्षण देखिन थालेको छ । अहिले प्रदेशमा दैनिकरुपमा एक सय देखी डेढ सयको हाराहारीमा सङ्क्रमण पुष्टि भइरहेको छ । ति मध्ये दैनिक रूपमा लक्षण देखिएका दर्जनौँ सङ्क्रमित अस्पताल भर्ना भइरहेका छन् । शनिवार मात्रै ७ जना सङ्क्रमित कोरोना अस्पताल भर्ना भएको सेती प्रादेशिक अस्पतालका सूचना अधिकारी दिलीप कुमार श्रेष्ठले बताए ।

‘आइसियुको आवश्यकता पर्ने गम्भीर प्रकृतिका १७ सङ्क्रमित अस्पताल भर्ना भएका छन,‘सूचना अधिकारी श्रेष्ठले भने,’तर हामी सँग १५ वटा मात्र आइसियु बेड छन् । अहिले दुई जनाको अक्सिजन जडित बेडमा राखेर उपचार गर्दैछौ । यस्तै खाले सङ्क्रमितको सङ्ख्या बढेमा व्यवस्थापनमा निकै समस्या पर्छ।’

‘गम्भीर प्रकृतिका लक्षणसहित सङ्क्रमित बढेपछि सुदूरपश्चिममा भएका सीमित आइसियु, भेन्टिलेटर र आइसोलेसन बेड भरिभराउ छन्,सूचना अधिकारी श्रेष्ठले भने,‘आइसियु र भेन्टिलेटर अभाव भएको छ । सेती प्रादेशिक अस्पतालका १५ वटै आइसियु बेड भरिएका छन्। अब आउने बिरामीलाई समस्या हुन्छ ।’

५० आइसोलेसन बेड रहेको सेती प्रादेशिक अस्पतालमा ४९ बेड भरिएका छन् । थप सङ्क्रमित आए बेड अभाव हुने सूचना अधिकारी श्रेष्ठले बताए। ‘आइसोलेसन बेड पनि भरिसकेका छन्, अब सङ्क्रमित आए भर्ना गर्न सक्ने अवस्था छैन,’ उनले भने ।
चिकित्सक भन्छन्,‘कोरोना नियन्त्रण बाहिर गइसक्यो’

भारतबाट आउनेहरू परीक्षणविनै घर गइरहेका छन् भने अर्कातिर सङ्क्रमण पुष्टि भएकाहरू पनि खुलेआम गाउँ–सहर घुमिरहेका छन् । नागरिक स्तरबाट पनि लापरबाही निकै बढेको छ । सरकारी कार्यालयमा मात्रै हैन बजारका पसल पसलमा पनि भीड बढेको छ ।

‘धनगढीमा ठेलमठेल देखिने सर्वसाधारणहरूले न सामाजिक दुरी कायम गरेका देखिन्छन्, न त मास्कको प्रयोग नै गरेका हुन्छन् । दसैँका नाममा त झनै लापरबाही बढ्यो,’स्वास्थ्य निर्देशक डा. गुणराज अवस्थीले भने,‘लापरबाही निकै बढेको छ, अवस्था यस्तै रहे धनगढीमा पनि काठमाडौँको जस्तै स्थिति आउँछ । हामी फेरि समुदाय स्तरमा पनि परीक्षणको तयारीमा छौँ’, उनले भने ।

सेती प्रादेशिक अस्पताल कोरोना उपचार विभाग प्रमुुख चिकित्सक शेरबहादुर कमरले कोरोना सङ्क्रमणका कारण अवस्था नियन्त्रणबाहिर गएको बताए। ‘कोरोना सङ्क्रमण र गम्भीर लक्षण भएका सङ्क्रमितको सङ्ख्या बढ्दै गएर अवस्था जटिल बनेको छ,’ उनले भने,‘अवस्था नियन्त्रणबाहिर गइसक्यो ।’ जटिल प्रकृतिका सङ्क्रमितको संख्या र मृत्युदर पनि बढ्दै गएको उनले बताए। ‘जटिल प्रकृतिका सङ्क्रमितको सङ्ख्या बढेसँगै आइसियु अभाव हुन लाग्यो,’ उनले भने, ‘अब अवस्था भयावह हुने देखिन्छ।’