तिलोत्तमा । संविधान दिवस मनाउनका लागि रुपन्देहीको तिलोत्तमामा राखिएका झण्डा हराएका छन् । असोज तीन गते आज (शनिबार) पाचौं संविधान तथा राष्ट्रिय दिवस मनाउनका लागि यूवाहरुको सामाजिक संस्था ‘नमस्ते नेपाल’ ले आयोजना गरेको कार्यक्रमका लागि सजाइएका झण्डा रातारात गाएव भएको हो । सजावटका लागि राखिएका झण्डा गएराती हराएको क्लबका अध्यक्ष अर्जुन खनालले जानकारी गराए । ऐतिहासिक तथा राष्ट्रिय गौरवको विषय संविधान दिवस मनाउन सजाइएका राष्ट्रिय झण्डा रातारात हराउनु दुःखद तथा आपराधिक व्यवहार भएको भन्दै उनले खेद प्रकट गरेका छन् ।
लिलोत्तमा १ र ३ अन्तरगत पर्ने शंकरनगर चोकमै सजाइएका २० बढी राष्ट्रिय झण्डा हराएका हुन । संस्थाले आज परेको संविधान दिवस मनाउनका लागि शुक्रबार साँझ ५० बढी राष्ट्रिय झण्डा सडकका पोलहरुमा झुण्डाइएका थिए । बाँकी रहेका ठाउँहरुमा आज थप झण्डाहरु सजाउने क्रममा झण्डा चोरी भएको थाहा पाएपछि प्रहरीलाई खबर गरिएको संस्थाका अध्यक्ष खनालले बताए । सडकमा राखिएको सिसि टिभी क्यामेराको पहुँच भन्दा बाहिर सजाइएका झण्डाहरु गायव भएका हुन् ।
सडक किनारमा राखिएका झण्डा हराउनु सामान्य होला तर, संविधान दिवसका लागि सजाइएका राष्ट्रिय झण्डा रातारात चोरी हुनु निकै दुःखद तथा उच्छृंखल गतिविधि भएको स्थानीय तथा अधिवक्ता यूवराज कंडेलले बताए । उनले भने ‘राष्ट्रिय झण्डाको महत्व नबुझेका वा संविधानप्रति अपनत्व नभएका समूहले त्यस्तो गरेको हुन सक्छ । जसले जुन उद्देश्य र नियतले गरेपनि राष्ट्रिय झण्डाको अपमान भएको छ ।’ तिलोत्तमामा यसअघि रातीमै बुद्धमूर्ति तोडफोड र सडक किनारका हरिया बिरुवा काटिएका थिए ।
प्रतिक्रिया