रुपन्देहीमा भोलिदेखि सवारी साधनमा जोर विजोर

बुटवल । रुपन्देहीमा निषेधाज्ञा असोज ४ गतेसम्मका लागि थप भएको छ । आइतबार बसेको जिल्ला कोभिड संकट व्यवस्थापन केन्द्रको बैठकले गरेको सिफारिस एवं जिल्ला सुरक्षा समितिको बैठकले गरेको निर्णयका आधारमा आइतबार राती १२ बजेदेखि असोज ४ गतेसम्म जिल्ला भर निषेधाज्ञा कायमै रहेको जिल्ला प्रशासन कार्यालय रुपन्देहीले जारी गरेको आदेशमा जनाइएको छ।

आदेश अनुसार रुपन्देहीमा सोमबारदेखि जोरबिजोर रुपमा निजी सवारी साधन सञ्चालन गर्न पाइने भएको छ । सोमबार बिहान ६ बजेदेखि जोर नम्बर हुने जोर गते र बिजोर नम्बर हुने निजी गाडी बिजोर गते चलाउन अनुमति दिएको हो। यातायात व्यवसायीले असोज १ गतेदेखि गाडी चलाउन पाउनुपर्ने माग गरेपनि प्रशासनले यात्रुवाहक सार्वजनिक यातायातका साधन सञ्चालन गर्न रोक लगाएको छ।

होटलहरुमा टेक अवेबाहेकका सेवा बन्द रहने जनाइएको छ ।  सभा गोष्ठी, तालिम, सेमिनार, पार्टीप्यालेस, सैलुन, समूहमा खेलिने खेलहरु पनि बन्द रहनेछन्। अति आवश्यक उपभोग्य वस्तु र सेवा, औषधिजन्य वस्तु र सेवा बाहेकका अन्य व्यापार व्यवसायलाई स्वास्थ्य सुरक्षाका मापदण्ड पूरा गरी बिहान १० बजेदेखि बेलुका ६ बजेसम्म मात्रै सञ्चालन गर्न दिइने भएको छ।

यस्तै शैक्षिक संस्था, प्रशिक्षण केन्द्रहरु, ट्युसन सेन्टरहरु, मठमन्दिर, मस्जिद, चर्चलगायतका धार्मिक स्थलहरुमा दैनिक नित्य पूजाबाहेकका काम गर्न रोक लगाइएको छ।