ताजा अपडेट »

पहिरो पूर्वसूचना जटिल तर सम्भव

बुधबार, २४ असार २०७७, ०७ : ५९
6 Shares

काठमाडौं । सरकारले जोखिममा आधारित पहिरो पूर्वसूचना प्रणाली विकासका लागि काम थालेको छ । यो जटिल भए पनि असम्भव भने नभएको जानकारहरूको भनाइ छ । बाढी पूर्वसूचना प्रणाली सुचारु रहे पनि पहिरोको पूर्वानुमान नहुँदा पहिल्यै जनधनको क्षति रोक्न सकिएको छैन ।

जल तथा मौसम विज्ञान विभाग, राष्ट्रिय विपद् जोखिम न्यूनीकरण तथा व्यवस्थापन प्राधिकरण र भूगर्भ विभागले मिलेर असरमा आधारित पहिरो पूर्वसूचना प्रणालीको विकासले काम थालिसकेको छ । “यस वर्ष प्रयास सुरु गरौँ भनेर तीनै निकायको संयुक्त पहलमा नक्साङ्कन थालेका छौँ,” प्राधिकरणका प्रमुख कार्यकारी अधिकृत अनिल पोखरेलले भन्नुभयो । पोखरेलले पहिरो पूर्वानुमान त्यति सजिलो नभए पनि असम्भव नै भने नभएको बताउनुुभयो । त्यस क्रममा सबैभन्दा पहिले चितवनको कविलास र गोरखामा पहिरोको पूर्वानुमान गरिएको थियो । ती परियोजना अहिले बन्द छन् । देशव्यापी सञ्जालका रूपमा पहिरो पूर्वसूचना प्रणाली निर्माण गर्ने सुरुआतका क्रममा भूकम्पले थिलथिलो बनाएका १४ वटा जिल्लाका हरेक नगरपालिका र गाउँपालिकामा पहिरो जोखिम नक्साङ्कनको काम सकिएको पोखरेलले जानकारी दिनुभयो ।

“त्यसलाई प्रयोग गरेर उच्च जोखिम, मध्य जोखिम र कम जोखिममा भएका घर पहिल्याउन सकेका छौँ”, पोखरेल सुनाउनुहुन्छ । आकाशबाट परेको पानीको पूर्वानुमानका आधारमा यी गाउँपालिका उच्च जोखिममा छन् भनेर खबर पुयाउन पहिरो पूर्वसूचना प्रणालीले सघाउने विश्वास उहाँले व्यक्त गर्नुभयो । जल तथा मौसम विज्ञान विभागका प्रवक्ता डा। अर्चना श्रेष्ठले पहिरो पूर्वानुमानका लागि गर्नुपर्ने आवश्यक काममध्ये अहिले प्राथमिक चरणमै रहेको उल्लेख गर्नुभयो । आजको गोरखापत्र दैनिकमा समाचार छ । 

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।