तिनाउमा घर फर्किनेहरुका लागि १ सय ४० वेडको क्वारेन्टाइन

तिनाउ । पाल्पाको तिनाउ गाउँपालिकाले भारतलगायत विभिन्न मुलुकमा रोजगारका लागि गएका व्यक्तिहरुको तथ्याङ्क संकलन गरी घर फर्किनेहरुलाई राख्न आवश्यक क्वारेन्टाइनको व्यवस्था गरेको छ । गाउँपालिकाले संकलन गरेको तथ्याङक अनुसार नेपाल बाहिर रहेका १ हजार ४ सय ५८ जना नागरिकहरुका लागि घर फर्ककेको अवस्थामा क्वारन्टाइनमा राख्न संरचना तयारी अवस्थामा राखेको गाउँपालिका अध्यक्ष ओमबहादुर घर्तिले जानकारी दिए ।

गाउँपालिकाका विभिन्न वडाहरुमा निर्माण गरिएको क्वारेन्टाइमा हाल सय जना बढी व्यक्तिहरु बसिरहेका छन् । हालसम्म तिनाउबाट रोजगारका लागि देशबाहिर गएका १ सय ५० जना नागरिक घर फर्किएकोमा ५० जना बढीलाई क्वारेन्टाइनमा १४ दिन बिताएर सामान्य स्वास्थय अवस्थामा घर पठाइएको छ । घर फर्किने व्यक्तिहरुका लागि विभिन्न स्थानमा १ सय ४० बेडको क्वारेन्टाइन निर्माण भएका छन् । वडा नम्बर १ का लागि कचलको युवावर्ष माध्यमिक विद्यालयमा २० वटा बेड, वडा नम्बर २ का लागि दोभान माविमा ३० बेड क्षमताको तथा वडा नम्बर ३ का लागि तिलोत्तमा मावि झुम्सामा २५ बेड क्षमताको क्वारेन्टाइन निर्माण गरिएको अध्यक्ष घर्तिले जानकारी दिए । यसैगरी वडा नम्बर ४ को पृथ्वी प्रकाश मावि सत्यवतीमा २० वेड, वडा नम्बर ५ को कल्याणी आधारभूत विद्यालय, चौविस माईलमा २५ वेड तथा वडा नम्बर ६ का लागि मस्याम माविमा २० वेडको क्वारेन्टाइन निर्माण गरिएको हो ।

आवश्यकता अनुसार क्वारेन्टाइनको क्षमतालाई वृद्धि गर्दै लगिने गाउँपालिकाले जनाएको छ । यसैगरी क्वारेन्टाइनमा बस्ने नागरिकहरुका लागि नियमित स्वास्थय परिक्षण, खाना नास्ता तथा व्यवस्थित बसाई मिलाइएको बताउँदै अध्यक्ष घर्तिले उनिहरु सबैको स्वास्थ्य अवस्था हालसम्म सामान्य रहेको जानकारी गराए