साहित्य सङ्गममा देवरात काव्यको परिचर्चा

बुटवल । साहित्य सङ्गम बुटवलको ३०३ औँ मासिक श्रृङ्खलामा आज साहित्यकार रमेश समर्थनद्वारा लिखित देवरात काव्यको कृति परिचर्चा कार्यक्रम सम्पन्न भएको छ ।

देवरात काव्यमा सत्यवादी राजा हरिषचन्द्र मानव बलि दिन किन तम्सिएँ ? के कारणले उनी मानव बलि दिने अवस्थामा पुगे? भन्ने कुरालाई काव्यात्मक शैलीमा प्रस्तुत गरिएको छ भने अजिगर्तले किन आफ्नै माहिलो छोरोलाई सत्यवादी राजा हरिषचन्द्रलाई बेच्यो ? किन ऊ आफ्नै छोरालाई बलिदिने बेला काट्न तयार भयो ? कसरी विश्वामित्रले बलि चढाउन लागेको शुनःशेपलाई बचाए ? भन्ने कुरा मार्मिक ढङ्गले प्रस्तुत गरिएको छ । कृति परिचर्चा गर्दै साहित्यकार रुद्र ज्ञवालीले देवरात काव्यले मानवतावादी चिन्तन, सामन्तवादी सोचप्रति विद्रोहको स्वर र पौराणिक विषयवस्तुलाई वर्तमान नेपाली समाजको वास्तविक यथार्थसँग जोडेको कुरा बताए ।

कवि रामचन्द्र श्रेष्ठले पुरानो कथामा वर्तमान यथार्थको प्रस्तुति र मिथलाई युगजनीन रूपमा कलात्मक ढङ्गले प्रस्तुत गरिएको बताए। कार्यक्रममा बोल्दै साहित्यकार ऋषिराम भुसालले निरन्तर साहित्यमा साधनारत समर्थनले देवरात कृतिमा मानवीय मूल्य स्थापित गर्न पौराणिक विषयवस्तुमा वर्तमान युगका कुरालाई जोड्दै मानवताको स्वर मुखरिकृत गरेको बताउँदै कृतिले पाठकको मन छुन सक्ने भएकाले एक पटक सबैले पढ्नुपर्ने बताए ।साहित्यकार देवेन्द्र घिमिरेको अध्यक्षता, ऋषिराम भुसालको प्रमुख आतिथ्यतामा सम्पन्न कार्यक्रममा रमेश समर्थनले लेखकीय दृष्टिकोण व्यक्त गरे ।

त्यसैगरी वाचित रचनाको समीक्षा राजेन्द्रकुमार आचार्यले तथा कार्यक्रमको सञ्चालन पुरुषोत्तम पाण्डेयले गरेका थिए ।