सिमेन्ट र स्टिलपछि गम्भिर सङ्कटमा पर्यटन उद्योग

काठमाडौं । छिमेकी राष्ट्र चीनबाट विश्वव्यापी बन्दै गरेको संक्रमण ‘ कोरोना भाइरस’ को जोखिम र त्रास नेपालमा पनि बढ्दै गएको छ । सरकारले विभिन्न क्षेत्रमा हाइ अलर्ट गरेसँगै नेपाली उद्योग क्षेत्रमा ठूलो प्रभाव पर्दैछ । भाइरस संक्रमणले विश्व अर्थतन्त्रमा गम्भीर समस्या देखिएपछि त्यसको प्रत्यक्ष असर नेपालका सिमेन्ट, डण्डी हुँदै पछिल्लो समय पर्यटन उद्योगमा देखिन थालेको छ । कोरोनाका कारण लुमिबनीमा आउने धेरै पर्यटकको संख्या ह्वात्तै घटेको छ । त्यसैगरी भारतबाट आउने पर्यटकको संख्या पनि घटेको छ भने आन्तरिक पर्यटकको संख्या पनि घट्दै छ ।

विकास निर्माण कार्य ठप्प र पूँजीगत खर्च न्यून भएपछि सिमेन्ट र स्टिल उद्योग गम्भीर सङ्कट परेको थियो । अहिले कोरोना भाइरस फैलिएका कारण नेपालको पर्यटन क्षेत्र पनि समस्यामा पर्न थालेको छ । पर्यटन आगमन कम भएपछि होटेको अकुपेन्सी दरमा भारी गिरावट आएको होटलहरुले जानकारी दिएका छन । कोरानाको असर निर्माण, आपूर्ति र पर्यटन क्षेत्रमा देखिन थालेको उनको भनाई छ ।  निर्माण व्यवसाय सुस्त हुँदा आर्थिक वृद्धि ६ प्रतिशत रहने अनुमान गरिएको छ । कोरना फैलिएपछि ५ प्रतिशत भन्दा कम हुने अनुमान गर्न थालिएको छ । कोरोनाको संक्रमणबाट जोगिन सरकारले ठूला सभा सम्मेलन नगर्न अनुरोध गरेको छ । यस्तै अन्तर्राष्ट्रिय उडान कटौति, अन–अराएभल भिसा रोकेपछि त्यसको प्रत्यक्ष असर पर्यटन उद्योगमा परेको हो ।

 खर्बौ रुपैयाँ लगानी भएको सिमेन्ट र स्टिल उद्योग नराम्ररी प्रभावित भइसकेका बेला पर्यटन उद्योग पनि थलिएको हो । अहिले आन्तरिक तथा बाह्य पर्यटक शुन्य भइसकेका छन् । पर्यटन उद्योग अन्तर्गत होटलमा गरिएको लगानी जाखिममा परेको छ । राजधानीमा मात्रै आधा दर्जन ठूलातारे होटल निर्माणधिन अवस्थामा छन । माओवादी द्धन्द्धपछि पर्यटन क्षेत्रमा पर्न लागेको ठूलो असरको रुपमा हेरिएको छ ।भाइरसका कारण संघीय सरकारले घोषणा गरेको भ्रमण वर्ष–२०२० स्थगित गरिएको छ भने प्रदेश ५ सरकारले घोषणा गरेको लुम्बिनी भ्रमण वर्ष –२०७६ पनि प्रभावित छ । दुबै भ्रमण वर्षबाट उत्साहित भएका यस क्षेत्रका पर्यटन व्यवसायी तथा उद्योगीहरु विस्तारै निरुत्साहित हुुँदैछन् । सम्भावना देखेर बैंक ऋण गरी लागनी गरेको उद्योगी व्यवसायी संकटमा परेको गुनासो गर्दै सरकारले ऋण तथा व्याजमा राहत दिनुपर्ने माग उठाउने सोँचमा छन् ।