अक्सफोर्डमा अध्ययनरत बुटवलका रिजन दुई सातादेखि सम्पर्कविहिन

बुटवल । बुटवल उपमहानगरपालिका–७ सुख्खानगरका रिजन खनाल दुई सातादेखि सम्पर्कविहिन भएका छन् । बुटवलकै अक्सफोर्ड कलेजमा कक्षा १२ मा अध्ययनरत २० वर्षीय रिजन सक्पर्मविहिन भएपछि परिवारले खोजिका लागि अपिल गरेको छ ।

भाद्रत १४ गते साथीलाई भेट्न भनि घरबाट हिँडेका रिजन हालसम्म पनि सम्पर्कमा नआएको भन्दै उनका बुवा ऋषिराम खनालले खोजिका लागि अपिल गरेका हुन् । छोरा सम्पर्कविहिन भएपछि भाद्र १५ गते ईलाका प्रहरी कार्यालय बुटवलमा खोजिका लागि जाहेरी दर्ता गराएका उनीहरुले हालसम्म पनि छोराका बारेमा कुनै जानकारी नपाएको भन्दै गुनासो गरेका छन् । ‘भाद्र १४ गते तीजको दिन साथीसँग भेट्न जान्छु भनि घरबाट झोलामा एक जोर कपडा बाकेर हिँडेको थियो । रातपरेपछि पनि छोरो घरमा नआएर सम्पर्क हुन नसकेपछि सोही दिन राती ईलाका प्रहरी कार्यालय बुटवलमा खोजिका लागि निवेदन दर्ता गराउन पुग्यो ।’–ग्लोबल आवाजसँग कुरा गर्दै रिजनका बुवा ऋषिरामले भने, ‘उक्त दिन २४ घण्टा नपुग्दै हराएको जाहेरी लिन नमिल्ने भन्दै हामीलाई फर्काइयो । दोस्रो दिन फेरी गएर निवेदन दर्ता यरायौं । तर हालसम्म प्रहरीले समेत कुनै जानकारी दिन सकेको छैन ।’

ऋषिरामका अनुसार रिजनको खोजि गर्ने क्रममा बुटवलबाट नेपालगन्ज जाने बसको टिकट काटेर त्यसतर्फ लागेको देखिन्छ । त्यसबाहेक अन्य कुनै जानकारी प्राप्त नभएको परिवारले जनाएको छ । रिजनको कल डिटेल हेर्दा समेत आफ्नो परिवार बाहेक कसैसँग पनि कुराकानी नभएको भेटिएको छ । कुनै पनि कुलत तथा मोवाईल गेमहरुमा समेत चासो नभएका उनी घरमा राम्रै कुराकानी गरेर सल्लाहले नै बाहिरिए पनि एक्कासि सम्पर्कविहिन भएको परिवारले बताएको छ । ईलाका प्रहरी कार्यालय बुटवलका प्रमुख प्रहरी नायव उपरीक्षक ठगबहादुर केसीले रिजनको खोजि कार्य जारी रहेको बताएका छन् ।

Advertisement