काठमाडौँ । अमेरिकी प्रतिनिधिसभाकी सभामुख न्यान्सी पेलोसीको ताइवान भ्रमणको विरोध गर्दै आएको चीनलाई पाकिस्तानको समर्थन प्राप्त भएको छ । पाकिस्तानको विदेश मन्त्रालयले ‘एक चीन’ नीतिमा अडिग रहेको र चीनको सार्वभौमसत्ता र क्षेत्रीय अखण्डतालाई समर्थन गर्ने बताएको छ । चीनले ताइवानलाई आफ्नो अंग मान्छ।
लगभग २५ वर्षपछि अमेरिकी उच्च अधिकारीले ताइवानको भ्रमण गरेका छन् । चीनले न्यान्सी पेलोसीको भ्रमणको नराम्रो परिणामको चेतावनी दिएको थियो। चीनले अमेरिकी राजदूतलाई पनि बोलाएको छ । अर्कोतर्फ अमेरिकाका लागि चिनियाँ राजदूतले पनि पेलोसीको विदेश मन्त्रालय र ह्वाइट हाउसको भ्रमणप्रति कडा आपत्ति जनाएका छन् ।
विदेश मन्त्रालयका प्रवक्ता असिम इफ्तिखार अहमदले भने, ‘पाकिस्तान ताइवान जलडमरूमा विकसित अवस्थाबाट चिन्तित छ। यस अवस्थाले क्षेत्रीय शान्ति र अस्थिरतामा गम्भीर असर पार्नेछ।’ उनले युक्रेन युद्धका कारण विश्व नै भयावह अवस्थाबाट गुज्रिरहेको बताए । यस्तो अवस्थामा विश्वले विश्व शान्ति, सुरक्षा र अर्थतन्त्रमा नकारात्मक असर पर्ने संकटको सामना गर्न सक्दैन ।
दुई देशबीचको सम्बन्ध आपसी सम्मान, आन्तरिक मामिलामा अहस्तक्षेप र राष्ट्रसंघको बडापत्र अनुसार समस्याको शान्तिपूर्ण समाधानमा आधारित रहेको पाकिस्तानको विश्वास रहेको प्रवक्ताले बताए ।
प्रतिक्रिया