भैरहवा । स्थानीय तहको निर्वाचनका लागि मंगलबार राति १२ बजेपछि मौन अवधि लागू गरिएको छ । यससँगै झण्डै एक महिनादेखि भइरहेको प्रचार–प्रसारको अन्त्य भएको छ ।
निर्वाचन आयोगले नगरपालिकाका प्रमुख/अध्यक्ष, उपप्रमुख/उपाध्यक्ष, वडा अध्यक्ष र सदस्यको निर्वाचनका लागि मतदान शुरु हुनुअघि ४८ घण्टा मौन अवधि तोकेको छ । मतदान सम्पन्न नभएसम्म मौन अवधि जारी रहनेछ ।
निर्वाचन धाँधली रहित, स्वच्छ, निष्पक्ष र भयमुक्त वातावरणमा सम्पन्न गर्न मौन अवधि तोकिएको छ । आयोगको आचारसंहिताले मौन अवधिमा दल, यसका आबद्ध, उम्मेदवार, संघ संस्था र अन्यलाई राजनीतिक अभियान, सभा÷गोष्ठी आयोजना गर्न नपाइने उल्लेख गरेको छ । मौन अवधिमा, सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्षमा वा विपक्षमा सन्देश, सूचना वा प्रचार सामग्री पोस्ट गर्न वा साझेदारी गर्न अनुमति छैन ।
आगामी बैशाख ३० गते नेपालमा ६ महानगर पालिका, ११ उपमहानगर पालिका, २ सय ७६ नगरपालिका र ४ सय ६० वटा गाउँपालिकामा एक साथ मतदान हुदैछ । नयाँ संविधान जारी भएपछिको यो दोस्रो स्थानीय तहको निर्वाचन हो । महिला ८७ लाख ४१ हजार ५ सय ३०, पुरुष ८९ लाख ९२ हजार १० र अन्य १ सय ८३ गरी कुल १ करोड ७७ लाख ३३ हजार ७ सय २३ मतदाता रहेका छन् ।
रुपन्देही जिल्लामा ३ लाख ८ हजार ५ सय ७४ महिला, ३ लाख २३ हजार ७ सय ७८ जना पुरुष ८ जना अन्य गरि कुल ६ लाख ३२ हजार ३ सय ६० जना मतदाता रहेका छन् ।
राति १२ बजेदेखि सीमा सील : तिवारी
नेपालको स्थानीय निर्वाचनलाई ध्यानमा राख्दै मंगलबार राति १२ बजेदेखि सीमा नाका सिल गरिदैे छ । रुपन्देहीका प्रमुख जिल्ला अधिकारी ऋषिराम तिवारीका अनुसार ७२ घण्टा अत्यावश्यक वस्तु बाहेक अन्य कुनै पनि आवतजावतमा रोक लगाइएको छ । दुई दिनसम्म औषधि, पेट्रोलियम पदार्थलगायत अत्यावश्यक वस्तु नेपाल आउन दिइने भएको छ । बाँकी मालवाहक ट्रक र अन्य ट्रकलाई नेपाल प्रवेशमा पूर्ण रोक लगाइनेछ । दमकल, एम्बुलेन्स लगायत बिना अवरोध आउ जाउ गर्न सक्नेछन् ।
तीन घेराको सुरक्षा ब्यवस्था : रेग्मी
रुपन्देहीमा मतदानलाई सफल एवम सुरक्षित बनाउन सुरक्षा घेरालाई ३ तहमा परिचालन गरिएको रुपन्देहीका प्रहरी उपरिक्षक रेविन्द्र रेग्मीले जानकारी दिएका छन् । जिल्लामा सुरक्षित तरिकाले मतदान गराउन म्यादी प्रहरी सहित ३ हजार ८ सय प्रहरी भित्रि सुरक्षामा रहने छन् । यसै गरि मतदान स्थलको बाहिरी सुरक्षामा शसस्त्र प्रहरी र त्यस पछि नेपाली सेना खटिने छ ।
यस बाहेक प्रहरी अधिकृत सहितको नेपाल प्रहरीको गश्ती टोली, शसस्त्र प्रहरीको गस्ती र नेपाली सेनाले पनि गस्ती मार्फत सुरक्षा दिनेछन् । “मतदाताहरुलाई भयरहित, निष्पक्ष, शान्तीपूर्ण तरिकाले अहिले चुनाव हुन्छ ।” एसपी रेग्मीले भने “ ढुक्क संग मतदान गर्न जानुस, केही असुविधा भए प्रहरी कन्ट्रोल १०० वा मेरो निजि नम्बर ९८५७०७५५५५ मा सोझै सम्पर्क गर्नुस ।”
प्रतिक्रिया