काठमाडौं । शंकास्पद वस्तु राखिएको हल्लापछि बन्द रहेको त्रिभुवन अन्तर्राष्ट्रिय विमानस्थल पुनः सुचारु भएकाे छ । महानगरीय अपराध महाशाखाका प्रमुख प्रहरी वरिष्ठ उपरीक्षक (एसएसपी) वसन्तबहादुर कुँवरका अनुसार खोजतलासका क्रममा कतै पनि शंकास्पद वस्तु 'बम' फेला परेन । अहिले त्रासपूर्ण वातावरण नभएको पनि उनले बताए । ‘केही छैन । तै पनि अपरेसन हुँदै छ । भित्र केही देखिएन । कसले र कसरी फोन गरेर बम छ भन्यो ? अनुसन्धान भइरहेको छ’ एसएसपी कुँवरले भने ।
बिहान १० बजेतिर विमानस्थलको एउटा ल्यान्डलाइन फोनमा फोन गरेर अपरिचति मानिसले आफू मुस्लिम समुदायको मान्छे भन्दै विमानस्थल परिसरमा बम राखेको र डिस्पोज गर्न चुनौती दिएको प्रहरीले जनाएको छ । त्यसपछि विमानमा चढ्ने क्रममा रहेका यात्रुहरूलाई ओरालेर विमानस्थलकाे मुख्य गेटबाटसमेत बाहिर निकालिएको थियो । विमानस्थलमा तालिमप्राप्त कुकुरसहित नेपाली सेना, नेपाल प्रहरी र सशस्त्र प्रहरी खटिएका थिए । सेनाको बम डिस्पोजल टोली पनि विमानस्थलमा पुगिसकेको थियाे । तर, केही पनि शंकास्पद बस्तु फेला नपरेपछि करिब डेढ घन्टापछि विमान उडान सुरु भएको छ ।
प्रतिक्रिया