१ सय नेपाली महिलाको उद्दार, ३१० जना पुगे बर्मा

माघ १९,

काठमाडौं । भारतका विभिन्न क्षेत्रबाट १ सय बढी नेपाली महिलाको उद्दार गरिएको छ । अवैध रुपमा विभिन्न मुलुक लैजान खोजिएका १ सय भन्दा बढी नेपाली महिलाको दिल्लीका विभिन्न स्थानबाट उद्दार गरिएको हो ।

माइती नेपाल र दिल्लीका विभिन्न निकायले शुक्रबार दिउँसो र राति गरी चार जना दलालसहित एक सय तीन जना नेपाली महिलालाई नियन्त्रणमा लिएको माइती नेपालले जनाएको छ।

उनीहरुलाई म्यानमारको बाटो भएर इराक र दुबई लैजान लागिएको आशंका गरिएको छ । उनीहरुलाई म्यानमारको सीमा क्षेत्रमा पर्ने टेङनेपालबाट उद्दार गरेको हो ।

नेपाली महिलाहरुलाई अवैध रुपमा मणिपुरको बाटो भएर म्यानमार लैजान खोजेको सूचनाको आधारमा मणिपुर प्रहरीले शुक्रबार विहानबाटै सर्च अपरेशन चलाएको थियो । त्यसपक्रमा विभिन्न ठाउँबाट उनीहरुको उद्दार गरिएको हो । उद्दार गरिएका नेपाली महिलालाई छिट्टै नेपाल ल्याइने माईती नेपालले जनाएको छ ।

मानव तस्करी गर्ने चार जना पक्राउ परेपनि एक जनाको मात्र पहिचान भएको छ । भारतीय सञ्चारमाध्यमका अनुसार सिन्धुपाल्चोकका ४२ वर्षीय आशाकाजी तामाङको मात्र पहिचान खुलेको हो । बर्माको बोर्डर मोरे भन्ने ठाउँबाट बर्मा लैजाने र त्यहाँबाट दुवई, इराक, इरान कुवेत लगायतका देशमा लैजाने तयारी गरिररहेका थिए ।

नेपाली महिलाको उद्दारमा यट्चेक नेटवर्क, इम्पल एनजिओ नेटवर्क, मनिपुर प्रहरी, मनिपुरको बालबालिका आयोग लगायत सक्रिय भएका थिए। गत डिसेम्बर र जनवरीमा मात्रै यो बोर्डरबाट तीन सय १० जना नेपाली बर्मा गएको तथ्यांक समेत प्रहरीले फेला पारेको छ।