ताजा अपडेट »

रुपन्देहीमा बाढीको विनाश (फोटोफिचर)

शुक्रबार, ११ भदौ २०७८, १५ : ०२

भैरहवा । सबै बिहान भएकोले ब्युझि सकेका थिए । भैरहवा परासी सडक खण्डको सेमरहवाका पनि सबै जना नित्य कर्ममा लागेका थिए । बिहान करिब ६ बजे एक्कासी घरमा पानी पस्न थालेपछि सबै हतारिदै ज्यान जोगाउन भौतारिन थाले । कसैका खाट बग्न थाले, कसैका चौपाया ।

एक्कासी पसेको बाढीका कारण चौपाया र अन्य सामाग्री जोगाउने प्रयासमा प्राय सबैको अन्न भिजेको छ । आधा घर नै भरिने गरि आएको पानीका कारण अधिकांशका माटोको भकारी फुटेर अन्न नोक्सान भएका छन् । बाढीको कारण घरमा रहेका सबै खाद्यान्नमा क्षती पुर्याएको स्थानिय रमेश कुर्मीले बताए । “बिहानै बाढी घरमा पस्यो, न अन्न जोगाउन सक्यौ न त पशु नै ।” उनले भने । बाढीले सेमरहवाका मात्रै ३५ घर अति प्रभावित भएका छन् । प्राय कच्ची घरहरु रहेको सो टोलमा अधिकांश घरको केही भाग मात्र डुब्न बाँकी रहेको छ ।

सेमरहवाका सबै परिवार बिहानै देखी भोका छन् । बालबालिकाहरु पानीमै भोकै जोगिएर बसेका छन् भने चौपायाहरु समेत आधा भन्दा बढी डुबेर भोकभोकै डुबान कम हुने प्रतिक्षा गर्दैछन् । अहिले सम्म सो क्षेत्रमा यस्तो बाढी नआएको स्थानीयहरु बताउछन् । विगत २४ घण्टादेखि परेको अविरल वर्षाका कारणले रुपन्देहीका विभिन्न क्षेत्रहरु डुबानमा परेका छन् । जिल्ला सदरमुकाम भैरहवा, तिलोत्तमा, मर्चवार तथा धकधई लगायतका दक्षिणका क्षेत्रहरु डुबानमा परेको छन् ।

मर्चवारको दानव खोलाले बाढीमा बगाएर ल्याएको दाउरा टिप्ने लोभमा खोलामा पसेका सम्मरीमाई गाउँपालिका वडा नम्बर ३ का २० बर्षिय बब्लु लोधलाई खोलाले बगाएको छ । बिहानै खोलाले बगाएका उनको अहिले सम्म पत्ता नलागेको र खोजी कार्य जारी रहेको प्रहरीको भनाई छ ।

यस्तै अविरल बर्षाका कारण रुपन्देहीकै रोहिणी गाउँपालिका वडा नम्बर १, ३ र ४ प्रभावित भएको छ । यी वडाहरुमा रहेका बस्तीहरुमा पानी पस्दा अधिकांश घर जलमग्न भएका छन् । घरहरु डुबानमा पर्दा घरभित्रका अन्न, लत्ताकपडा, घरपालुवा पशुपंक्षीहरु पनि प्रभावित भएका छन् ।

यस्तै भैरहवा–भुमहि मूख्य सडक खण्ड पनि प्रभावित बनेको छ । मूख्य बाटोमै करिब ३ फिट पानी बगेको कारण सवारी आवागमन प्रभावित बनेको छ । मूख्य बाटोबाट आउदै गरेको भारतीय ट्रक पनि पानीले बगाएको छ । भैरहवा–बुटवल सडक खण्डको पनि भलवारी, पत्थरडाँडा, मधवलिया क्षेत्र प्रभावित भएको छ ।

राधेश्याम विश्वकर्मा
लेखकको बारेमा
राधेश्याम विश्वकर्मा