२३ असार २०७९, बिहीबार

Jul 7, 2022

नवलपुर ।  राष्ट्रिय गौरवको आयोजनाको रूपमा रहेको नारायणगढ–बुटवल सडक विस्तारको कामले तीव्रता पाउन सकेको छैन । कोभिड–१९ का कारण सडक विस्तारमा ढिलाइ भइरहेको अवस्थामा मनसुन शुरु भएसँगै सडक विस्तारमा थप जटिलता आएको नारायणगढ–बुटवल सडक विस्तार आयोजनाले जनाएको छ । 
 
नारायणगढ–बुटवल सडक विस्तार आयोजना खण्ड १ का सूचना अधिकारी इञ्जिनीयर कृष्ण आचार्यले बर्सातको समयमा पुल निर्माणको काम मात्रै भइरहेको जानकारी दिए  । “नारायणगढबाट पाँच किलोमिटरदेखि १२ किलोमिटरसम्ममा माइनर ब्रिज निर्माणको काम भइरहेको छ”, अचार्यले भने  “यहाँ सात वटा माइनर ब्रिज निर्माणका क्रममा रहेकाले राजमार्गमा डाइभर्सन निर्माण गरेर यातायात सञ्चालन गरिरहेका छौँ ।” सात वटा साना पक्की पुलमध्ये तीन स्थानको पुलको ढलान सकिएको आचार्यले जानकारी दिए  ।
 
“ढलान सकिएका पुलको साइडको वाल र रेलिङ बनाउने काम बाँकी छ, त्यो निर्माण भएपछि पुलबाटै सवारी साधन सञ्चालन गर्न सकिन्छ”, आचार्यले भने, “त्यस्तै दुई वटा पुलको सुपर स्ट्रक्चर (ढलान गर्नुपूर्व)को काम भइरहेको छ, भने अन्य दुई वटामा पनि तीव्ररूपमा काम हुँदैछ ।” अहिले बर्खाको समय भएकाले कामदार थपेर कामको गति बढाउन सक्ने अवस्था नरहेको उहाँले बताए । “बर्खामा पुलको कामबाहेक अन्य ठाउँको काम गर्न सम्भव छैन, अन्य काम गर्नै नमिल्ने भएपछि मजदुर बढाएर मात्रै काम चाँडो हुँदैन”, आचार्यले भने । 

Advertisement

नारायणगढ–बुटवल सडक विस्तार आयोजना खण्ड १ प्रमुख रमेशकुमार दिष्टीले दिनहुँजस्तो पानी परिरहेकाले पुल निर्माणबाहेक अन्य काम गर्न नसकिएको बताए । “मनसुनका कारण आवश्यकतानुसार सडक विस्तारमा मजदुर परिचालन गर्न सकिएको छैन”, दिष्टीले भनी  , “दैनिकजसो पानी परिरहेको कारण मजदुरले पनि काम गर्न नपाउने र ठेकेदारले पनि काम दिन नसक्ने अवस्था छ ।” पानी पर्न रोकिने बित्तिकै सडक विस्तारका लागि रुख काट्न पनि जनशक्ति परिचालन गरिने उहाँले बताए। 

“आयोजना विस्तारका लागि कटान हुनुपर्नेमध्ये ९० प्रतिशत रुख काटेर सकिएको छ”, दिष्टीले भनी, “दाउन्ने क्षेत्र र दुम्किबास क्षेत्रमा केही रुख काट्न बाँकी रहेका छन् तर पानी परिरहेको अवस्थामा रुख काट्न नमिल्ने भएर त्यो काम त्यसै रोकिएको हो ।” आयोजनाअन्तर्गत झण्डै ११ हजार रुख काटिने भन्दै दिष्टीले रुख काटेर सकिएलगत्तै विद्युत्को पोल सार्ने काम पनि शुरु गरिने बताए । “बिजुलीको पोल हटाउन विद्युत् प्राधिकरण, ठेकेदार र हामी सबै तयार छौँ”, उनले भने , “पानी रोकिएपछि सडक विस्तारको काम द्रूत गतिमा हुने हामीले अपेक्षा गरेका छौँ ।” 

सडक विस्तारको कामको प्रगति आठ प्रतिशत भएको भन्दै दिष्टीले बर्खापछि कामले तीव्रता पाउने बताउनुभयो । पूर्वपश्चिम राजमार्गको बुटवल–नारायणगढ सडकखण्ड विस्तारको कामलाई गैँडाकोट दाउन्ने (६५ किमी)सडकलाई ‘खण्ड १’ तथा दाउन्ने बुटवल (४९ किमी)सडकलाई ‘खण्ड २’ मा विभाजन गरेर निर्माणको काम भइरहेको छ । ग्लोबल टेन्डरमार्फत रु १६ अर्ब ९९ करोड ५२ लाखमा दुवै खण्डको निर्माणको जिम्मा चाइना स्टेट कन्स्ट्रक्सन इञ्जिनीयरिङ कर्पोरेशनले पाएर निर्माणको काम अगाडि बढाएको हो । 

चार लेनमा विस्तार हुने सो सडकको शहरी क्षेत्रमा छ-छ मिटरका अतिरिक्त सर्भिस लेन हुनेछ भने बीचमा हरियालीसहितको डिभाइडर रहने जनाइएको छ । नवलपरासी पूर्व र पश्चिम तथा रुपन्देही गरी तीन जिल्ला छुने यस सडकमा साना ठूला गरी २१ वटा पक्की पुल निर्माण हुनेछन् भने जङ्गलमा चार वटा वन्यजन्तुमैत्री पुल निर्माण गरिनेछ । निवर्तमान प्रधानमन्त्री एवं एमाले अध्यक्ष केपी शर्मा ओलीले विसं २०७५ चैत ८ गते शिलान्यास गरेको सडक तीन वर्षभित्र निर्माण सम्पन्न गर्नुपर्नेगरी ठेक्का सम्झौता भएको थियो । 

प्रतिकृया दिनुहोस्

Flash News

उपराष्ट्रपतिले भारतीय राजदूतसँग भने– नेपाल, भारत र चीनबीच त्रीपक्षीय सहकार्य गर्नुपर्छ एम्बुलेन्स दुर्घटना हुँदा तीन महिने शिशुको मृत्यु मिस्टर एण्ड मिस नवलपरासीको उपाधि रवि र श्रुतिलाई लुम्बिनीको दाङमै उत्पादन हुन्छ डिएपी मल माओवादी पोलिटव्युरो १२५ सदस्यीय, प्रचण्डको परिवारबाट चार जना (नामसहित) नेप्से १६ अंकले घट्यो माओवादी केन्द्रको माग- एसपीपीमा सहभागी नहुने पत्र अविलम्ब अमेरिकालाई पठाइयोस् कारागारमा क्षमताभन्दा तीन गुना बढी कैदीबन्दी, सुत्न र शौचालय जान समस्या प्रचण्डको प्रतिवेदन केन्द्रीय समितिबाट सर्वसम्मतिले पारित स्कुल बस दुर्घटना हुँदा ८ जना घाइते बुढीगंगाको मतदान केन्द्रमा तनाव, प्रहरीद्वारा हवाइ फायर तिनाउ करिडोरमा काम गर्ने एक मजदुर बुटवलको देविनगरमा मृत फेला आधारभुत विद्यालय : कोठा एक, कक्षा चार रुपन्देहीमा अवैध रूपमा ल्याउँदै गरेको सुनसहित भारतीय पक्राउ १५ वर्षीया किशोरी बलात्कृत पदाधिकारी आजै टुंगिन्छः वर्षमान पुन उपाध्यक्षमा नारायणकाजी ‘कन्फर्म’, कुन पदमा कसकाे सम्भावना धेरै ? रुपन्देहीको दानापुर तालमा डुबेर सैनामैनाका पाण्डेको मृत्यु सुनको भाउ एक हजार चार सय रुपैयाँ घट्यो पदाधिकारी टुंगो लगाउन खुमलटारमा माओवादी बैठक सुरु