ताजा अपडेट »

रुपन्देहीमा निषेधाज्ञाको नयाँ मापदण्ड, पहाडी जिल्लामा खाद्यान्न पुर्याउन नयाँ व्यवस्था

विहीबार, २० जेठ २०७८, १५ : ५०
4 Shares

भैरहवा । जिल्ला प्रशासन कार्यालय रुपन्देहीले निषेधाज्ञाको मापदण्ड परिमार्जन गर्दै जेठ ३१ गतेसम्मका लागि लम्बाएको छ । जिल्ला प्रशासन कार्यालयले कोरोना संक्रमणको प्रभावलाई मध्यनजर गरी जारी निषेधाज्ञालाई जेठ मसान्तसम्म थप गर्ने निर्णय गरेको हो । बुधबार जिल्ला प्रशासन कार्यालयमा बसेको बैठकले निषेधाज्ञा थप गर्ने निर्णय गरेको जिल्ला प्रशासन कार्यालयका सूचना अधिकारी जनक थापाले जानकारी दिए । यस अघि जिल्लास्तरीय कोभिड संक्रमण व्यवस्थापन केन्द्र (डीसीसीएमसी)को बैठकको निषेधाज्ञा थपको सिफारिस गरेको थियो ।

बैठकले वर्षायाममा पहाडी जिल्लाहरुमा खाद्यन्य ढुवानी गर्न समस्या हुने भएको हुदाँ व्यवसायी तथा सुरक्षाकर्मीको समन्वयमा स्वास्थ्य मापदण्ड अपनाई रातको समयमा ढुवानी गर्न दिने निर्णय गरेको छ । वर्षायाम नजिकिदै गरेको हुँदा पहडी जिल्लाहरुमा बाढी पहिरो लगायतका कारण खाद्यन्न पुराउन हुने समस्यालार्ई मध्यनजर गर्दै निषेधाज्ञाको अवधीमा पनि ठूला खाद्य स्टोरहरुबाट सामान ढुवानीका लागि रातको समयमा खोल्न दिने गरी मौखिक सहमति भएको बैठकमा सहभागि एक सदस्यले ग्लोबल आवाजलाई जानकारी दिए । यस अवधिमा शान्ती सुरक्षा तथा सुब्यवस्था, स्वास्थ्य, खानेपानी, दुध, बिद्युत, दमकल, संचार, भन्सार, क्वारेन्टाईन, फोहोरमैला, ब्यवस्थापन, ईन्धन, एम्बुलेन्स, स्वास्थ्यकर्मि, औषधी र अत्यावश्यक वस्तु तथा माल समान ढुवानी गर्ने ढुवानीका साधन जस्ता अति आवश्यक सेवा सन्चालनमा रहनेछन् ।

जिल्ला भित्र सबै प्रकारका निजि तथा सार्वजनिक यात्रुवाहक सवारी साधन सञ्चालन गर्न निषेध गरिएको छ । कुनै पनि भेला, भिडभाड जम्मा हुन, मानिसहरु भेला, जात्रा सञ्चालन गर्न, महोत्सव वा सभा जुलुस गर्न पनि निषेध गरिएको छ । सबै प्रकारका सभा, पार्टी प्यालेस, सिनेमा हल, सेमिनार, तालीम, गोष्ठि, सम्मेलन, सैलुन, मनोरञ्जन स्थल, डिपार्टमेन्टर स्टोर, सपिङ्ग मल, ब्यूटिपार्लर र स्विमिङ्ग पुल, स्पा, संग्रहालाय, पुस्तकालाय, समूहमा खेल्ने खेलकुद, जिमखाना आदि सञ्चालन गर्न पनि रोक लगाईएको छ ।

त्यस्तै पराम्परागत रुपमा भई आएको दैनिक रुपमा हुने आन्तरिक नित्य पूजा बाहेकका सम्पूर्ण धार्मिक, साँस्कृतिक गतिविधिहरु सञ्चालन तथा जमघटमा पनि प्रशासनले रोक लगाएको छ । शैक्षिक संस्थाहरु, प्रशिक्षण केन्द्रहरु, भाषा कक्षा, ट्युसन सेन्टर लगायतका जमघट हुने गतिविधिहरु सञ्चालन गर्न तथा होटल, रेष्टुरेन्ट सञ्चालन गर्न रोक लगाईएको छ ।

https://www.globalaawaj.com/archives/110632
बसन्त आचार्य
लेखकको बारेमा
बसन्त आचार्य

आचार्य ग्लोबल आवाज अनलाइनका डेस्क संयोजक हुन् ।