ताजा अपडेट »

भिम अस्पताललाई रोहिणीको ५ लाख

सोमबार, ०३ जेठ २०७८, १५ : ५९
2 Shares


भैरहवा । रोहिणी गाउँपालिकाले जिल्लाको सरकारी अस्पताल भिम अस्पताललाई ५ लाख रुपैया सहयोग गरेको छ । रोहिणी गाउँपालिकाका अध्यक्ष सनोजकुमार यादवले ५ लाख रुपैँयाको चेक भिम अस्पतालका मेडिकल सुपरिटेण्डेण्ट डाक्टर शकुन्तला गुप्तालाई प्रदान गरेका छन् ।चेक बुझ्दै मेसु गुप्ताले अहिले अस्पताललाई स्थानिय तह लगायत अन्य संघ संस्थाहरुका सहयोग आवश्यक रहेको बताइन् ।

कोभिडको यो महामारीको समयमा अहिले जनशक्ति र अक्सिजनमा अत्याधिक खर्च रहेको बताईन । उनले समयमै सरकारी बजेट आई नपुग्दा अक्सिजनको रकम बुझाउन समेत अप्ठ्यारो भई रहेको बताइन् । यस्तो अवस्थामा रोहिणी गाउँपालिकाको यो सहयोग अति महत्वपूर्ण रहेको बताइन् । उनले माथीबाट बजेट आई पुगे पनि सो रकमलाई अन्य शिर्षकमा खर्च गर्न सक्ने बताइन्। अहिले सम्म रोहिणी गाउँपालिका बाहेक सम्मरीमाई गाउँपालिकाले पनि ३ लाख रुपैया सहयोग गरेको जानकारी दिइन्।

चेक प्रदान गर्दै रोहिणी गाउँपालिकाका अध्यक्ष सनोज कुमार यादवले जिल्ला स्थित सरकारी अस्पतालको संरक्षण गर्नु रुपन्देहीको सबै स्थानीय तहहरुको समान दायित्व रहेको बताए।उनले सरकारी अस्पताललमा कुनै एक पालिकाको मात्र नभई सबै पालिकाका बिरामी उपचार पाउने भएकोले यसको संरक्षणमा सबैका दायित्व हुनुपर्ने जिकिर गरे । उनले रोहिणी गाउँपालिकाले निर्णय नै गरेर अस्पताललाई सहयोग गरेको बताए । ‘यसले अरु पालिकाहरुलाई पनि भिम अस्पताल प्रतिको दायित्व बोध गराउने काम गर्दछ ।’ उनले भने “ अहिले आवश्यक परेको समयमा सहयोग नगरे कहिले गर्ने ?” सहयोग प्रदान गर्ने क्रममा गाउँपालिका अध्यक्ष यादवले अस्पतालमा रहेका रोहिणी गाउँपालिकाका बिरामीका साथै अन्य बिरामीहरुलाई भेटेर उनिहरुलाई आश्वासन दिएका थिए ।

रुपन्देही जिल्लाका सरकारी अस्पतालको रुपमा रहेको भैरहवा स्थित भिम अस्पतालमा अहिले रुपन्देही जिल्लाका सबै पालिकाका मात्र नभई अन्य जिल्लाका पनि कोभिडका बिरामीहरुको उपचार भइरहेको छ । अस्पतालका मेडिकल सुपरिटेण्डेण्ट डाक्टर शकुन्तला गुप्ताले अहिले भिम अस्पतालमा ८१ जनासम्म कोभिडकै बिरामी रहेको र सबै जनाले अक्सिजन लिइरहेको जानकारी दिइन् ।

राधेश्याम विश्वकर्मा
लेखकको बारेमा
राधेश्याम विश्वकर्मा