सेनाको जहाजले रुपन्देहीमा दोस्रो पटक ल्यायो अक्सिजन सिलिण्डर

भैरहवा । नेपाली सेनाको जहाज मार्फत एयरलिफ्ट गरि रुपन्देहीमा ६० सिलिण्डर अक्सिजन ग्यास ल्याइएको छ । रुपन्देहीमा अक्सििजन ग्यासको अभाव हुन नदिन जिल्ला सुरक्षा समिति रुपन्देहीले केन्द्रिय कोभिड संकट व्यवस्थापन केन्द्र समक्ष अक्सिजन उपलब्ध गराइदिन माग गरेको थियो । सोही बमोजिम विराटनगरबाट सेनाको जहाजमार्फत् शनिबार दिउँसो ४ बजे गौतमबुद्ध विमानस्थलमा ६० सिलिण्डर अक्सिजन झारिएको हो ।

सेनाको जाहाज मार्फत् अक्सिजन ल्याइएको प्रमुख जिल्ला अधिकार अस्मान तामाङले बताएका छन् । “पछिल्लो समय अक्सिजनकै अभावमा जिल्लामा मानविय क्षति भएकोले र यहाँको उत्पादनले नधानेपछि अक्सिजन अभावमा कसैको ज्यान जोखिममा नपरोस् भनेर हामीले केन्द्रसँग अनुरोध गरेका थियौ ।” तामाङ्गले भने “सोही अनुसार आज अक्सिजन आईपुगेको छ ।”

अक्सिजन ल्याएर आएको जहाजमा रुपन्देहीबाट ६० वटा खाली सिलिण्डर रिफिलका लागि पुनः विराटनगर पठाइएको छ । उक्त सिलिन्डिर रिफिल गरेर सोही जहाजले आज नै रातिसम्म रुपन्देहीमा अक्सिजन आपूर्ति गर्ने तामाङले जनाए । जहाजमार्फत् दिउँसो ल्याइएको अक्सिजन सबै बुटवलस्थित लुम्बिनी प्रादेशिक अस्पतालमा पठाइएको छ । साँझ आउने अक्सिजन आवश्यकताका आधारमा अन्य अस्पतालहरुमा समेत पठाइने प्रशासनले जनाएको छ ।

अक्सिजन अभावमा संक्रमितको धमाधम मृत्यु हुन थालेपछि गत बुधबार साँझ सेनाको हेलिकोप्टर मार्फत् ४० सिलिण्डर अक्सिजन रुपन्देही ल्याईएको थियो । रुपन्देहीमा उपचारमा रहेका कोभिडका बिरामीका लागी अहिले आएको अक्सिजन पनि अपुग भएकोले यो संख्या अझै बढाउनु पर्ने अस्पतालहरुको माग छ । जिल्लामा रहेका अक्सिजन उत्पादकहरुले माग अनुसार आपूर्ति गर्न नसेक पछि जिल्लाबाट बाहिर भए पनि डिसीसीएमसीले अक्सिजनको आपूर्ति गर्ने प्रयास गरेको छ ।